La jornada deu 14 de heurèr de 2018 qu’amassè estudiants, actors associatius e institucionaus, ensenhaires e cercaires dens lo maine occitan, qu’i estón abordadas las questions de formacion, de practicas e ressorsas pedagogicas atau com de didactica deu biplurilinguisme, dab tres talhèrs.
Aquera jornada qu’estó donc un temps d’escambi enter los diferents participants, e sustot, un espaci d’expression entaus ensenhaires e actors de la cultura occitana qui òbran, a divèrs nivèus, entà l’ensenhament de l’occitan au quotidian. Aqueths escambis que miralhèn divèrs punts de vista en exprimir las dificultats e las tensions encontradas regularament dens la mesa en plaça e lo manteniment d’aqueth ensenhament de la mairau a l’universitat.
Que muishèn tanben l’especificitat de l’ensenhament d’ua lenga minoritària qui, dens un encastre sociodidactic, implica adaptabilitat, engatjament e perseverança deus ensenhaires dens las parets de la sala de cors e en dehòra. Daubuns d’aqueths participants que responón au noste convit de contribucion en deishar un escriut de la lor intervencion que liuram ací-après, atau com ua tribuna, respectant la lor libertat de paraula e d’expression, rebat deus talhèrs qui’s debanèn.
